Daoine a Itheann Daoine

There are no translations available

Mícheál Ó Ruairc - Biography

Ciarraíoch ó dhúchas é Mícheál Ó Ruairc. Tá cónaí air i mBaile Átha Cliath le tamall maith de bhlianta. A shaol caite aige go dtí seo ag teagasc agus ag scríobh. Is múinteoir páirtaimseartha é faoi láthair san Institiúid Oideachais i mBaile Átha Cliath. Is file agus scríbhneoir é chomh maith. Go dtí seo tá trí chnuasach filíochta i gcló agus tá naoi n-úrscéal foilsithe aige, ina measc An bhFaca Éinne Agaibh Roy Keane? (Coiscéim, 2003), Pónairí ar Thósta (Comhar, 2007) agus An Saol i Sladbhaile (Coiscéim, 2008). Foilsíodh cnuasach gearrscéalta do dhaltaí Ardteiste leis, Na Lucha ag Rince, anuraidh.

More information: www.cic.ie

Excerpt from Daoine a Itheann Daoine

Ag a sé a chlog tráthnóna Dé hAoine stop an veain bhuí i lár na cearnóige bige in eastát galánta i ndeisceart Bhaile Átha Cliath. Stop sí san áit a raibh bréagthobar, bréagfhuarán agus bréagchaidéal spallta curtha ag amadán de rachmasaí éigin gan réasún.
Ar feadh tamaill níor tharla tada. Ansin, de réir a chéile, thosnaigh na daoine ag teacht ina nduine is ina nduine i dtreo na veain go raibh baicle mhaith bailithe ina leathchiorcal in aice léi. Sheasadar ansin go foighneach gan focal astu, mar a bheifeá ag súil leis in eastát mar é. Maidir leis an veain, d’fhan sí ansin ina colgsheasamh gan fuinneog dhall ná doras doicheallach ag sméideadh ná ag caochadh súile ar éinne. Mar sin féin, d’fhan na daoine ina seasamh san áit ina rabhadar gur imigh solas an lae ina chosa in airde thar dhromchla na dtithe isteach i bhfirmimint an aeir is gur thuirling fallaing an dorchadais ina áit.
Ansin, agus an chuma ar an scéal nach dtarlódh tada go deo na ndeor, osclaíodh haiste beag ar thaobh na veain de phlimp agus sháigh fear maol, meánaosta a chloigeann róin amach agus lig béic as a chloisfeá sa Domhan Faoi Thoinn:
“Bíodh bhur gcuid airgid réidh agaibh!” ar seisean.